आनन्दभूमि स्थविरवाद बुर्द्धधर्मसम्बन्धी मासिक पत्रिका हो । बु.सं. २५१६ -वि. सं. २०३० बैशाख) देखि प्रकाशन भएको आनन्दभूमि बौद्ध मासिक पत्रिका आनन्दकुटी विहार संस्थाको प्रकाशन हो । पाठकको सहजता र आवश्यकतालाई मध्यनजर गरी नेपाली, नेपालभाषा तथा अंग्रेजी भाषामा लेख रचना, विचार, बौद्ध गतिविधि एवं कार्यक्रमहरूलाई आनन्दभूमिमा समावेश गरिएको छ । आनन्दभूमि नाफारहित पत्रिका हो, जसमा सम्पादक मण्डलले पूर्णरुपले धर्मसेवाको रुपमा कार्य गर्दै आइरहेको छ ।
आनन्दभूमिको ऐतिहासिक पृष्ठभूमि
नेपालमा बुर्द्धधर्म प्रचारप्रसार गरेकोले वि. सं. २००१ श्रावण १५ गते तत्कालीन राणा प्रधानमन्त्री श्री ३ जुद्धशम्शेरले आठ जना भिक्षु/श्रामणेरहरुलाई देश निकाला गर्यो । त्यसपछि श्रीलंकाका भिक्षु नारद महास्थविरको नेतृत्वमा आएको भिक्षुहरूले राणा सरकारसँग भेट गरी निस्काषित भिक्षुहरूलाई वि. सं. २००३ सालमा पुनः भित्रयाउन सफल भयो । त्यसका बाबजुद पनि नेपालमा बुर्द्धधर्म प्रचारप्रसार गर्न कठिन थियो । त्यस कुरालाई मनन् गरी आनन्दकुटी विहार गुठी (हालः आनन्दकुटी विहार संस्था) ले वि. सं. २०३० बैशाख (बु.सं. २५१६)मा आनन्दभूमिको प्रथम अंक प्रकाशित गर्यो । सुरुवातमा भिक्षु अश्वघोष, वटुकृष्ण “भूषण” र न्हुछेबहादुर वज्राचार्यबाट सम्पादन एवं प्रकाशन गरिएको आनन्दभूमि १२ पृष्ठको मात्र थियो । सुरुवातमा आनन्दकुटी विहार गुठीको मुखपत्रको रुपमा प्रकाशन भएको आनन्दभूमि हाल आएर नेपालको पहिलो बौद्ध मासिक पत्रिकाको रुपमा स्थापित भइसकेको छ ।
आनन्दभूमिको उद्देश्य
बुद्धशिक्षा हासिल गर्न चाहने तर उचित विहार, भिक्षु, श्रामणेर, अनागारिका तथा बौद्ध विद्वानहरूको अभाव साथै व्यस्त समयको कारण बुद्धशिक्षाबाट वञ्चित भइरहेकाहरूलाई सुलभ तरिकाले बुद्धशिक्षा प्रचारप्रसार एवं जनमानसमा फैलाउनु नै यसको उद्देश्य रहेको छ ।